2018年8月30日 星期四

高雄市 85大樓

大家有去過高雄旅行的話,應該會知道高雄最高既建築物 - “85大樓”。

85大樓除咗係商業辦公室、酒店之外,仲有好多既民宿係度,原來呢啲民宿,稱之為套房,係同一般房屋一樣,可以自由買賣,回報亦相當唔錯。

有景觀既單位,大約300萬-500萬新台幣。無景既單位,百零萬新台幣就有交易。呢類型單位多數由民宿公司承租,租金收入穩定,回報約6-7%。


2018年8月29日 星期三

高雄市租屋記

今年暑假同囝仔去咗高雄一個月多啲,唔想住酒店,於是係591揾下有無短期租約既單位,最終揾咗間可以短租一個月既兩房單位。

單位位於左營區,離巨蛋約10分鐘步程,離左營火車站約5分鐘步程。月租3萬新台幣,兩房單位,樓齡頗舊(23年),但勝在景觀超靚,同大樓既管理做得幾好。

因為只租一個月關係,租金會係貴50%左右。正常一年租約黎講,租金大約2萬新台幣左右。

住得呢棟大樓,當然要八下住緊既單位樓價啦。原來二十幾年樓,有景觀KEEP得好,個價都幾硬淨,兩房單位都要開價4、5百萬新台幣。

天呀! 呢個價可以買到新樓了...........
當然實際成交可能打個八折左右








高雄 買入中古車

上次講到暑假係高雄租咗一個月屋,咁既然要生活一個月,日常出入交通係一個要考慮既問題。

係高雄,如果你無機車(電單車)代步的話,等如無咗對腳,一係就揸私家車代步。我無機車車牌,所以唯有諗揸私家車。

一個月雖然唔係好耐,但係計落都無理由租車揸成個月,諗諗下不如買架中古車代步,揸一個月,之後先再算。

最終睇咗兩日,花了5萬3新台幣,買咗部16歲既中古車。部車雖然殘殘地,但性能都算唔錯,由高雄上台中,再由台中上台北基隆,之後再落返高雄,都無問題,呢5萬3新台幣,已回本了,哈哈。

其實呢啲咁殘既車,係香港都好難見到有人揸,莫講話買賣。但係高雄,仲有啲更舊更殘既車係路上行走,果然係奢侈品同必需品既分別。


高雄市 新興區 中古透天

咩叫透天? 
透天就係一棟房屋,一般約有二至四層樓連地。

市區因已發展多年,因此位於市區透天一般屋齡較高,但老舊透天價值主要為土地本身價值,建築物房屋價值已不高,除非透天己重建或已重大翻修。

以下呢間位於市區中心位置的一間小透天,全屋可用面積約1300呎,高四層,一樓為客飯廳,二及三樓為套房,四樓為二房一廁,門口可以泊車。屋齡五十年,房屋外觀內櫳已翻新,售價1000萬新台幣,約257萬港元。係香港買個車位都未必得。




高雄市左營區 預售屋

高雄市樓價大約係香港價價既六分之一。一個左營區既樓花(預售屋),位置離高鐵及捷運站約五分鐘步程,附近又有大型百貨公司,重要係名校網(名星校區),兩房單位,實用約500呎,連車位(機械上層),售價約台幣六百萬元(約155萬港元),還可價講。同類型房屋既租金大約2萬2千台幣左右,回報約4.4厘。